Wasomali wafanya maandamano dhidi ya al-Shabab baada ya shambulizi kali la kwenye hoteli

Mamia ya Wasomali, wakiwemo maafisa wakuu wa serikali, wamefanya maandamano ya amani mjini Mogadishu, Somalia, ili kulaani kundi la mrengo wenye itikadi kali za dini la al-Shabab kufuatia shambulizi kali la kwenye hoteli ya Lido Beach View lililosababisha vifo vya watu 37.

Wakikusanyika katika eneo la hoteli hiyo, waandamanaji walikuwa wamebeba mabango ya kuipinga al-Shabab na kulaani ukatili wa kundi hilo. Huku wakitamka kauli mbiu za kukemea na kuchukizwa na al-Shabab, waandamanaji hao pia walionyesha mshikamano wao kwa watu waliouawa na wengine 247 waliojeruhiwa katika shambulizi hilo.

Miongoni mwa waandamanaji hao walikuwepo manusura, mawaziri na maafisa walioapa kutotishwa na ugaidi na kuwataka Wasomali kuungana na kushirikiana na vyombo vya usalama kukabiliana na ugaidi.